Dag moatjes,

ook moeke moet er aan geloven voe digitaal bezig te zien, dusja bie deze…
kgon e ki e bitje utleg geven van wa da wiender ier allemale uitspoken he.
We zitten ier van november 23 dus we begin al e bitje uze droaj te vin.

in begin was da nie simpel, we zien e bitje begon me vanalles: tearoom, snacks,tapas,warm eten enzovoort voe te kieken wa dat der ier ging anslaan, en kan chanse, gelik dak wilde en ze rap begin kom voe vis te eten, en oendertuschen zie we eigelijk nen echt visrestaurant geworden, en met alles der roent, dus ne vaste viskoarte, suggestie’s, wen beiregoeie palink, schaal en schelpdieren mo let up, je kut in priciepe ier alles eten, mo da wil nie zeggen da alles op de koarte stoat he, want de zéé ligt nie in miene nof…

tis simpel: aje achter etwa goeste et, gift eki e belletje 2 dagen op voorand, mussels, oentjes, roggevlerken, krifte, oesters, coquilles, krabbe, fruit de mer, terbut… je kut zo zot nie peizen of kent voe je.

men ier dus e schone menukoarte en iedere weke suggestie’s en da kuje volgen op facebook of intagram of je mag gie eki beln ook we, men iedere dag snoes behalve de zundag e lunch dien kost 24.50 euro voe 2 gang en 27.50 euro voe 3 gang, ook da kuj zien op faceboek.

men ook iedere moant e moantmenu roent de 50 euro, da kuje altied en
ge kut ook besteln van uze afhaalmenu, mo pastop he, je moe wel minimum ne dag of 2 van voorand besteln want anders lukt me da nie.
aje gie e feestje et voe je familie of je moaten, spring toen eki bin voe ne menutje te bespreken, want op moate van je bughet foefeln we twa in makoar, me drank en al daje wit wo daje stoat.

voor da we ier afsluten nog zeire bitje uszelve vorensteln:

ik zien jesica, alias “Moeke” geboren in 84 en gelik da je ku peizen in Ostende en do zie kik heel preus op, dochter van geweune werkmeschen mo ken der verekt vele van geleerd, me ma kan supergoed koken, ken da van eur mee, van do de name Moekes keuken, als eerbetoon an me ma, en me pa was visser, heel ze leven tot in het graf… jis op 25/08/18 op zéé gebleven, vertrokken en nie mi weregekeerd. De grotste klop dak ooit en gekregen, en geloof me, ken der al vele gekregen. Je ziet in us interieur verwijzingen nar em. De liefde voe vis is der ingeramd van kleins af, en de liefde voe de zéé en voe Ostende zeker, elke dag leren kik nog bie.

ne vint e kik nie, peizen dak e bitje te moeilijk zien of te kieskeurig, al zoek toch bliede zien met nog ne twien in me leven.

gelukkig ek Imilio me zeune, me trots, die ook de gastheer is in moekes keuken, Imilio is van’t joar 2009 en ook geboren in Ostende, ne heel joenk vintje dus, ne volgt e opleidinge duaal leren in brugge en is dus ook binst de weke aanwezig, behalve de disendag want toen et ie schole, ne doet da al heel goed mo makt nateurlijk nog fouten, dus nemt het em nie kwoalijk ater e ki e twa is, ne doe ze best. Imilio kriegt eulpe van e poar toffe flexi’s en studenten en ik trouwens ook van laure.

en toen is er nog uze casper, ne schattige pluzebolle die uze mascotte e bitje is. Ne komt af en toe eki goeiendag zeggen, want jis superlief, mo aje benauwd et moeje da mo zeggen en dan bluft ie in zn kamertje of in den nof

allee zeg, je gie uz nu al leren ken, tis topen da wiender joen nu meugen leiren ken, en aje komt en tis etwa, zeg het us geweune, of roept e ki of komt eki goeiendag zeggen in de keuken, want doen kik mien best mo kzien kik sergio nie he, en et asjebliefd e bitje geduld want laure elpt wel mee an de schuttels en de opkus en bitje koude keuken mo al de reste got deur mien an, en aje nie vele gin tiet et, zeg het e ki aje toekomt aje wilt.

allee zeg toe toene he!